Er Ajuntament de Naut Aran a impulsat ua naua iniciatiua entà ajudar ath sector dera tresau edat deth municipi. En aguest sens, s’aufrirà a toti es vesins majors de 75 ans qu’ac solliciten un relòtge de teleassisténcia entà qu’es sòns familhars poguen saber en tot moment en quin estat se trape aguesta persona.
Aguest relòtge, aurà era capacitat de vincular-se damb un telefòn deth familhar. S’eth familhar marche de casa per motius laboraus o personaus e a de deishar ara persona grana soleta ena sua viuenda en ua posicion que non pòt comunicar-se damb eth, pòt saber gràcies ath telefòn, a on ei, se s’a queigut o es sues constantes vitaus entà saber qu’eth familhar se trape en un estat de salut adequat.
Ath delà, era persona grana usatgèra deth servici de teleassisténcia pòt sarrar un boton entà avertir ath familhar e, s’aguest non respon, pòt telefonar ath 112 entà qu’avertisque ath servici d’emergéncies e poguen anar çò de mès lèu possible a on ei eth pacient e respóner atau ara sua crida de socors.
Eth baile de Naut Aran, César Ruiz-Canela, destaque que “credem qu’aguesta mesura sociau ei fòrça potenta pr’amor que permet as familhars d’aguestes persones majors poder anar tà trabalhar o gésser a hèr d’auti ahèrs d’ua forma fòrça mès tranquilla, perqué poderàn auer ath sòn pair, mair, mair-sénher o pair-sénher monitorizat en tot moment damb aguest sistèma que les permeterà actuar damb mès celeritat en cas d’ua urgéncia reau. Era nòsta gent grana deth municipi a tostemp estat ua prioritat entà nosati”.
Er Ajuntament de Naut Aran finançarà quinsevolh tipe sigue de còst que sigue restacat ad aguest relòtge de teleassisténcia. Entre es sues despenses, se sufragarà era inversion iniciau deth dispositiu qu’ei de 100 èuros, atau coma era quòta de manteniment mensuau dera aplicacion qu’ei de 12 èuros ath mes. Eth pressupòst totau destinat ad aguesta accion ei de 100.000 èuros.