Eth plen der Ajuntament de Naut Aran a aprovat aguest maitin ua pujada deth 0.6 ath 0.75 der impòst de bens immòbles (IBI) damb es vòts a favor de Convergéncia Aranesa e d’Aran Amassa e era abstencion deth grop d’Unitat d’Aran.
Eth baile der Ajuntament de Naut Aran, César Ruiz-Canela, destaque que “damb aguesta pujada der IBI cercam mès ingrèssi en consistòri pr’amor qu’auram de hèr actuacions tanplan ambicioses coma eth macroprojècte en centre de Salardú, totes es viuendes sociaus que volem bastir enes nòsti pòbles e d’auti projèctes que milhoraràn era vida des nòsti vesins.”
Er impòst de bens immòbles non se pujaue des de hè 12 ans e der an 2000 non se puge eth valor cadastrau.
Ath delà, tanben s’a aprovat per unanimitat aumentar era licéncia d’òbres d’un 3% a un 3.5%, un hèt que demore afectar sustot ad aqueres persones e promotores que hèn granes accions immobiliàries en municipi e non tant as vesins que dejà compden damb bonificacions en aguest ahèr damb un maximom de 2.000 èuros. Fin finau, tanben s’a aprovat er aument deth prètz entà sollicitar es licéncies d’abitatge toristic de 100 a 300 èuros.