Eth plen der Ajuntament de Naut Aran a aprovat aguest maitin damb es vòts en favor deth grop de Convergéncia Aranesa e es abstencions d’Unitat d’Aran e Aran Amassa eth pressupòst mès gran de tota era sua istòria. En totau, aguest ascendís enquias 7.030.000 èuros, que supause un aument pròplèu ath 5% respècte eth d’est an passat.
Se manten era aportacion que realize eth consistòri de Naut Aran de 165 èuros per abitant entà cadua des poblacions entà que poguen realizar trabalhs de manteniment o méter polit eth municipi damb ornamentacion florau, hèt important pr’amor que totes es localitats formen part dera distincion de Viles Florides.
Eth baile der Ajuntament de Naut Aran, César Ruiz-Canela, explique que “aguesti pressupòsti son continuistes. Les didem atau pr’amor que seguissen era linha de d’auti ans e qu’an foncionat certament plan ben. Eth municipi genère riquesa e atractius e gràcies ad açò podem parlar qu’aué aprovam eth pressupòst mès gran dera nòsta istòria. Es inversions les decidiram en plens posteriors”.
Ath delà, tanben s’a aprovat, de forma provisionau, eth gran projècte deth centre de Salardú en quau ei contemplat un parcatge soterrani, un centre de dia entara gent grana e equipaments culturaus e esportius. Ara se portarà era prepausa entara Comission d’Urbanisme dera Val d’Aran entara sua aprobacion e seguir en tot auançar en aguest gran equipament de futur.
Fin finau, s’a dat lum verda, damb era negativa d’Aran Amassa, ara declaracion institucionau de supòrt ara candidatura des Jòcs Olimpics d’iuèrn de Pirenèus-Barcelona-Saragossa deth 2030.