Era equipa de govèrn der Ajuntament de Naut Aran impulse un projècte entara creacion de 6 abitatges plurifamiliars de loguèr sociau dirigit a joeni deth municipi damb er objectiu de combàter eth gran problèma d’abitatge qu’a, non sonque aguesta zòna deth territòri, mès era rèsta dera Val d’Aran tanben.
En aguest sens, aguest blòc se plaçarie ena plaça dera Pica de Salardú, apròp dera glèisa Sant Andreu de Salardú e damb vistes entara poblacion d’Unha e era montanha deth Pui d’Unha. Serie estructurat per abitatges de 2 a 3 dormitòris que cada un compdarie entre 70 e 110 mètres quarrats abitables. S’a aprovat iniciauments eth projècte basic e dejà se compde damb er informe favorable dera comission d’auviatge entath bastiment d’aguesti abitatges gràcies a qu’aguesti terrens son deth pròpri consistòri e an era catalogacion de terren urban.
Enes pròplèu mesi s’harà eth projècte executiu e se pretén trèir era licitacion de cara ara fin d’aguest madeish an. Es òbres començarien pendent era primauera der an que ven.
Eth baile de Naut Aran, César Ruiz-Canela, destaque que “aguesta ei era prumèra pèira damb era que sajam de solucionar es problèmes des joeni ara ora de trapar un abitatge damb un prètz sociau laguens deth nòste pròpri municipi. Son fòrça es casi que mos an vengut en tot explicar-mos que pendent toti aguesti ans auut dificultats entà trapar un abitatge a un prètz mejan. Ei per açò que, mos vedem en besonh d’aportar eth nòste gra de sable coma ajuntament e establir era que credem que pòt a èster era milhor aportacion entà eri”.
Atau madeish, tanben concrète que “auem volut centrar aguesta accion en collectiu juvenil, mès auem en cap futures accions entà d’auti collectius coma eth des trabalhadors e d’auti residents de Naut Aran entà que poguen disposar d’un abitatge a un prètz digne”.
Er Ajuntament de Naut Aran ja aprovèc de manèra definitiva era creacion de mès abitatge sociau anterioraments en macro complèxe que se plaçarà ena part centrau dera poblacion de Salardú e qu’anarien mès de 30 abitatges d’aguest tipe entara gent grana dera zòna.