Eth Plen der Ajuntament de Naut Aran a aprovat aguest maitin per unanimitat ua ordenança damb era que vòlen bonificar as vesins que loguen es sòns abitatges pendent tot er an e non òpten per loguèrs destinadi ar abitatge toristic o per sasons. En aguest sens, s’a fixat un prètz de 8€ eth m2 coma limit entà poder realizar aguesti loguèrs.
Des deth consistòri se compensarà as vesins qu’amien a tèrme aguesta practica en tot subvencionar en un 50% era factura der Impòst sus Bens Immòbles (IBI) que paguen en municipi cada an. Entà poder beneficiar-se d’aguesta ajuda deth consistòri, aurà de complir-se era condicion que tant eth futur abitant der immòble coma er arrendador siguen andús empadronadi en Naut Aran.
Eth baile municipau, César Ruiz-Canela, explique que “mos cau potenciar era creacion d’abitatge sociau e deuant açò, cercam formules entà milhorar coma aguest parc d’abitatge sociau. Credem que pòt èster ua mesura positiva entà totes dues parts pr’amor que les aportaram ajuts en referéncia ar impòst deth IBI o ara ora de trobar un lòc a on víuer”.
Ath delà, ena session plenària, tanben s’a aprovat ua modificacion de pressupòst de 198.000 èuros que destaque en era ua partida de 100.000 èuros entà poder renauir era pista poliesportiua de Salardú e melhorar es sòns vestiaris perqué an de besonh èster reabilitadi.
Fin finau, s’a dat lum verd ara adesion deth municipi de Naut Aran ara “Associació de Viles Termals de Catalunya”.