Er Ajuntament de Naut Aran a invertit 10.000 èuros entà méter potja naua en ua superfície de 250m2 e milhorar eth sistèma de drenatge e de règ dera escòla Ruda de Salardú abans que s’inície eth cors escolar en aguesta infraestructura municipau.
Eth consitòri a amiat a tèrme aguesta accion pr’amor qu’eth solèr se trapaue en un estat fòrça maumerent e en cèrtes zònes i auie acumulacions de hanga que non permetien eth jòc d’ua forma adeqüada as escolans que formen part deth centre educatiu. Ath delà, tanben s’a trabalhat en renauiment deth règ e eth drenatge dera zòna entà que non i auessen acaparaments d’aigua.
Era tinent d’alcalde der Ajuntament de Naut Aran, Anna Geli, explique que “des der Ajuntament de Naut Aran, s’a actuat ena escòla Ruda de Salardú perqué meritaue un cambi en airaus concrèti coma ère era potja en tot actuar de formar rapida e en tot sajar d’assolidar er espaci de léser des escolans. Ei ua milhora substanciau, pr’amor que se tracte d’un pati de potja naturau, eth quau molt pògues escòles pòden compdar damb eth e auem creigut qu’ère de besonh hèr ua actuacion en aguest sens. Era nòsta mainadèra deth municipi tostemp serà ua prioritat entà nosati”.
Aguesta actuacion s’a hèt de forma estrategica abans der inici deth cors escolar entà que non i auesse cap tipe d’afectacion en aguest entorn.