Er Ajuntament de Naut Aran apòste pera luta pera salut mentau des vesins non sonque deth municipi senon dera rèsta dera Val d’Aran damb era presentacion dera associacion Amentaran ena Sala Polivalenta de Salardú pendent era tarde deth 30 d’agost. En aguest sens, frut d’aguest acte, eth consistòri a mediat entre era EMD d’Arties e Garòs e Amentaran entà que poguen emplegar dues sales der ajuntament d’Arties tà amiar a tèrme dinamiques e sessions en prò dera salut mentau.
Era presidenta d’Amentaran, Tess Lorente, explique que “volem arregraïr ar Ajuntament de Naut Aran per ajudar a lançar eth projècte pr’amor que pensam qu’es administracions an d’anar dera man des associacions tà qu’aguestes poguen trabalhar e èster ath costat des persones.”
Ath delà, ahig que “es sales les utilizaram entà formar un grop d’ajuda mutua e un aute contra es dependéncies”.
D’un aute costat, eth baile municipau, César Ruiz-Canela, destaque que “Amentaran ei ua associacion que vò favorir era salut mentau de toti es nòsti vesins e açò ei fòrça positiu. Nosati coma ajuntament seram ath sòn costat en tot ajudar-les pr’amor que sabem qu’era societat a de besonh accions coma aguesta, valentes, recipròques e d’acompanhament”.
Er acte ena Sala Polivalenta siguec amenizat peth grop de balh aranés ‘Balharan’ atau coma per Maria Cinta e eth sòn balh Bolywood e per un aperitiu aufrit peth consistòri.