Er Ajuntament de Naut Aran seguís ena linha d’aufrir as sòns vesins ajudes sociaus entà que poguen gaudir des diuèrses activitats que se pòden amiar a tèrme en municipi e ena rèsta dera Val d’Aran.
En aguest sens, se subvencione enquia un maximom de 200 èuros as mainatges e mainades e joeni de 0 a 18 ans que s’apunten a quinsevolh classe d’activitat extraescolara, ja sigue culturau, esportiua o lectiua. Sus açò, es pairs e mairs o tutors legaus auràn de liurar es corresponentes factures ath consistòri entà que siguen bonificades. De cadua d’eres, s’agarrarà eth 20% e d’aciu gesserà aguesta bonificacion. Se pòden presentar tantes sollicituds coma se volgue enquia arribar ath maximom subvencionable que son aguesti 200 èuros.
Eth baile de Naut Aran, César Ruiz-Canela, destaque que “volem qu’es nòsti joeni deth municipi agen era oportunitat de poder gaudir dera aucupacion extraescolar que mès les interèsse. Les auem dat tostemp supòrt e mos i predaram entà que sigue atau per molt temps”.
Eth periòde de sollicituds se poderà hèr de forma telematica enquiath 20 de deseme deth 2021 e se pòden presentar es justificants que siguen, tostemp e quan s’agen expedit pendent er an 2021. Se veiràn beneficiadi ath torn de 300 mainatges mercés a ua partida de 60.000 èuros der Ajuntament de Naut Aran.