Er Ajuntament de Naut Aran a finalizat es trabalhs d’adeqüacion definitiua der espaci dera piscina climatizada deth municipi plaçada en Salardú entà que se tròbe en perfèctes condicions de cara ara sua dubertura, prevista entad aguest pròplèu dimèrcles 3 de junh. Aguesta temporada i aurà ua grana nauetat pr’amor que, per prumèr viatge, se cauharà er aigua dera piscina mejançant biomassa gràcies ara creacion deth ‘District Heating’ qu’auec lòc en mes de noveme d’aguest an 2025. Naut Aran auance enes sues politiques d’eficiéncia e sostenibilitat damb aguesta accion.
Era entrada ath recinte aurà dus còsti diferenti, coma ei d’abituda, entàs residents deth municipi de Naut Aran, e entàs dera rèsta dera Val d’Aran e visitants. Sus açò, eth còst per dia entàs residents de Naut Aran menors de 7 ans serà gratuït; entàs de 7 a menors de 14, 2 èuros per dia; entàs adults de 14 a 65, 3 èuros per dia e entàs majors de 65, gratuït.
Tàs que non residissen en Naut Aran eth prètz serà 1€ a menors de 7 ans, 3€ de 7 a menors de 18 ans, 5€ de 18 a menors de 65 ans e 1€ a mès de 65 ans.
En çò que tanh as abonaments de sason entàs vesins deth municipi, eth còst entàs joeni de 7 a menorsde 14 ans, serà de 18 èuros; de 14 a 65 ans aurà un còst de 30 èuros e fin finau tanben s’a prepausat un ‘pack’ familhar per valor de 50 èuros.
Eth baile de Naut Aran, César Ruiz-Canela, destaque que “mantiem es prètzi des darrèrs 4 ans en aguest equipament municipau entà aufrir ua alternativa mès d’òci e léser entàs vesins e visitaires que volguen gaudir d’un bon dia ena piscina. Aguest espaci compde damb dues piscines, ua de grana e ua auta de mès petita, ua extensa superfície de jardin e un bar e restaurant pròpri, çò que demòstre qu’ei un emplaçament molt complèt entà totes es edats. Demoram que sigue un gran ostiu”.
Eth barrament deth complèxe ei contemplat entath 30 d’agost e demorarà de deluns a dimenge de 11:00 a 20:00 ores, tostemps e que non plòigue e era temperatura ambient sigue superiora as 17 grads.
