Er Ajuntament de Naut Aran trabalhe pendent aguestes setmanes ena adeqüacion definitiua der espaci dera piscina climatizada deth municipi plaçada en Salardú entà que se tròbe en perfèctes condicions de cara ara sua dubertura, prevista entad aguest pròplèu diuendres 3 de junh.
En aguest sens, des deth consistòri, s’aufrirà era possibilitat d’accedir e gaudir d’aguestes installacions de forma completaments gratuïta en ua jornada de pòrtes dubèrtes en aguesta data d’estrea entà que poguen descorbir es usatgèrs toti es auantatges que disposaràn ath long de tota era sason d’ostieu.
A compdar deth dissabte dia 4 de junh era entrada ath recinte aurà dus còsti diferenti, entàs residents deth municipi de Naut Aran, e entàs dera rèsta dera Val d’Aran e visitants. Sus açò, eth còst per dia entàs residents de Naut Aran menors de 7 ans serà gratuït; entàs de 7 a menors de 14, 2 èuros per dia; entàs adults de 14 a 65, 3 èuros per dia e entàs majors de 65, gratuït.
En çò que tanh as abonaments de sason entàs vesins deth municipi, eth còst entàs joeni de 7 a menors de 14 ans, serà de 18 èuros; de 14 a 65 ans aurà un còst de 30 èuros e fin finau tanben s’a prepausat un pack familhar per valor de 50 èuros.
Eth baile de Naut Aran, César Ruiz-Canela, destaque que “era piscina municipau de Salardú ei un des principaus atractius damb es que compdam en nòste territòri pr’amor qu’ei un complèxe espectacular damb dues piscines, ua entàs mès petiti, e ua auta entà mès grani, damb un bar e restaurant pròpri e ues condicions entà gaudir deth bon temps pendent un gran nombre d’ores. Demoram ua grana arribada de visitants pendent aguesta sason”.
Eth barrament deth complèxe ei contemplat entath dia 4 de seteme.
