Eth Plen der Ajuntament de Naut Aran a aprovat damb es vòts a favor de Convergéncia Aranesa e era abstencion d’Unitat d’Aran e d’Aran Amassa ua modificacion pressupostària de 2.125.000 èuros ena que destaque era creacion de viuenda sociau en municipi.
En aguest sens, son contemplades laguens d’aguesta naua aportacion, eth bastiment des sies viuendes dera plaça dera pica de Salardú, era viuenda sociau de Garòs e era de Tredòs. En cas dera partida de Salardú se destinarà mès de 1.200.000 èuros, 115.000 en Tredòs e 70.000 èuros en Garòs.
Eth baile der Ajuntament de Naut Aran, César Ruiz-Canela, afirme que “èm molt contenti de poder aprovar aguesta modificacion pressupostària pr’amor qu’ei un des passi definitius entà poder crear viuenda de loguèr sociau entà joeni e familhes que volguen un espaci entà víuer tot er an en nòste parçan.
Ath delà, ena rèsta dera modificacion tanben se plantège ua partida de 500.000 èuros entara prumèra fasa dera creacion deth district heating de Naut Aran, 50.000 èuros entath manteniment e reparacion deth pati dera escòla Ruda de Salardú autant coma 71.000 èuros entara milhora deth camin de Plan de Nera enquiath Refugi de Colomèrs (GR 11).
En d’autes qüestions deth plen s’a aprovat era ordenança reguladora dera taxa entara licéncia d’autotaxis e d’auti veïculs de loguèr entà que non i age especulacion damb es licéncies d’aguest tipe de veïculs en pròpri municipi. D’un aute costat tanben s’a aprovat era creacion dera Comission d’Abitatge entara legislatura 2019-2023.