Er Ajuntament de Naut Aran inície era transicion entara naua normalitat e anóncie era celebracion dera hestivitat de Sant Andreu entara darrèra setmana d’aguest mes de noveme tàs vesins des localitats de Salardú e Baqueira.
Sus açò, s’a premanit un sopar damb toti es empadronats ena sala polivalenta de Salardú era net deth 27 de noveme, e dempús, s’a programat un balh popular. En aguest sens, es persones que volguen assistir ad aguest eveniment auràn de presentar eth certificat COVID digitau dera Union Europèa coma indique era normativa prepausada pera Generalitat de Catalonha.
Ath delà, eth dia 30 de noveme tàs 11:00 se celebrarà era missa en aunor a Sant Andreu, patron dera poblacion de Salardú e eth nuclèu de Baqueira ena glèisa Santa Andreu de Salardú.
Eth baile de Naut Aran, César Ruiz-Canela, explique que “èm fòrça contenti de poder tornar a hèr aguest tipe d’actes e eveniments e qu’es vesins mos pogam amassar, tostemp en tot respectar es restriccions que siguen respècte eth coronavirus. Ei un prumèr pas entara normalitat”.
Des der Ajuntament de Naut Aran s’estudiaràn es possibles cambis que poguen produsir-se enes normatiues o es restriccions e que poguen hèr a modificar er eveniment.