Er Ajuntament de Naut Aran a aprovat era modificacion des NNSS entara implantacion d’un sistèma de distribucion de calor (district heating) entara poblacion de Salardú. Sus açò, cau destacar qu’eth consistòri a era intencion de plaçar aguest sistèma de cauhament ath cant dera Aubèrja de Salardú damb eth prètzhèt de poder cauhar es principaus equipaments publics damb es que compde eth consistòri.
En aguest sens, se’n veirien beneficiadi, entre d’auti, era sala polivalenta, era escòla Ruda, era piscina de Salardú, eth pròpri Ajuntament de Naut Aran, es rampes calefactades que i a en pròpri pòble o eth futur Centre Civic e Sociau de Salardú. Era forma de cauhament serà damb biomassa mejançant eth convèni forestau que se signèc damb eth Conselh Generau d’Aran er an passat e damb eth que s’inclodissen accions coma aguesta autant coma eth manteniment des pistes forestaus deth municipi.
Eth baile de Naut Aran, César Ruiz-Canela, destaque que “eth district heating mos ajudarà ara ora de poder cauhar toti es nòsti equipaments municipaus e en tot trabalhar damb es energies sostenibles, que seràn era referéncia en futur”.
Damb aguesta accion, eth consistòri mòstre eth sòn compromís damb es energies renauïbles e verdes e en sòn prètzhèt de seguir en tot trabalhar pera eficiéncia energetica. Era inversion totau ascendirà enquias 1.408.000 èuros des quaus, 399.000 èuros seràn subvencionadi a trauès des hons Next Generation dera Union Europèa.