Er Ajuntament de Naut Aran amassa damb es sues EMD’s an amiat a tèrme ua accion entà qu’es vesins e visitants dera Val d’Aran poguen recórrer eth municipi e conéisher es lòcs d’interès e mès emblematics de toti es sòns pòbles gràcies a ua sèrie d’enigmes qu’auràn de resòlver.
Entà poder participar, calerà escanejar eth còdi “QR” que serà plaçat ena sedença dera oficina de torisme de Salardú o enes bars, restaurants e hotèls des poblacions, entà atau començar eth jòc. A trauès d’aguest prumèr còdi, eth jogador aurà ua immersion totau en ua istòria restacada damb cada localizacion e qu’auançarà e en tot descorbir a mesura que progresse.
Es tematiques seràn totauments variades era foncion deth pòble en qué se jògue: en cas d’Arties se diderà “er origen deth Taro”; en Bagergue “eth contrabandista de Bagergue”; en Garòs “Mandronius, eth gigant de Garòs”; en Gessa “camin der exili”; en Salardú “eth setge de Salardú”, e en Unha “eth secrèt d’Unha”. Pròximament, tanben s’abilitaràn espacis coma aguesti en Tredòs e eth nuclèu agregat de Baqueira.
Eth baile de Naut Aran, Cesar Ruiz-Canela, explique que “gràcies ad aguesti enigmes, es nòsti vesins e visitants poderàn descorbir cornèrs unics des nòstes poblacions d’ua forma divertida e unica. Damb aguesta aplicacion, generam un nau atractiu toristic entà totes es epòques der an”.
Aguesta experiéncia ei pensada entà que poguen jogar es familhes amassa e víuer d’ua forma diferenta era estada ena zòna de Naut Aran. Dera madeisha manèra, un d’aguesti jòcs ei pensat mès que mès entà mainatges, coma ei eth cas d’Unha, qu’a arrecebut dejà fòrça bones critiques.
Era durada des enigmes variarà era foncion dera rapidesa des participaires, mès rondarà des 60 as 90 menutes e se poderà trapar en aranés, castelhan, catalan e francés. A dia d’aué dejà se pòt jogar en toti es pòbles a excepcion de Tredòs e Baqueira pr’amor qu’es trabalhs de programacion dera aplicacion non an finalizat.