Er Ajuntament de Naut Aran a creat era prumèra edicion deth prèmi internacionau de pentura Naut Aran Baqueira que preten dar a hèr conéisher eth municipi e que poguen arribar òbres artistiques d’un nivèu excellent e excepcionau.

Era tematica ena qu’es artistes auràn de realizar es sòns diboishi ei totauments liure tostemp e que complisque damb un unic requisit, qu’eth paisatge, poblacion o zòna que pinten, sigue der entorn de Naut Aran. Ei per açò, que se poderàn realizar quadres coma deth Santuari de Montgarri, era montanha deth Montarto o d’auti sectors espectaculars d’aguesta demarcacion.

Er objectiu d’aguest concors ei eth de dar a conéisher a nivèu internacionau eth municipi de Naut Aran pr’amor qu’ei dubèrt entà que participe quinsevolh persona sigue deth país que sigue.

Des deth consistòri, s’a fixat ua prumèra e ua dusau posicion laguens deth concors que seràn dotadi de 6.000 e 3.000 èuros respectivaments. Se harà ua preseleccion des 50 milhores òbres des que s’escuelheràn aguestes dues guanhadores, e, era rèsta, seràn exposades en ua sala d’exposicions que se condicionarà entà poder gaudir dera vartietat artistica des autors. Aguestes òbres auràn era possibilitat d’èster venudes ena exposicion e era totalitat de çò que s’ingrèsse anarà entath pròpri artista.

Cada creador aurà era possibilitat d’enviar un totau de dues òbres en format ‘JPG’ damb ua bona resolucion entara pagina web de ‘Mundo Arti’, referent laguens deth mon pictòric, enquiath pròplèu 31 de gèr deth 2022. Eth jurat serà composat per personalitats d’arreconeishuda importància en camp des arts plastiques e era sua decision serà inapellable.

Eth baile de Naut Aran, César Ruiz-Canela, concrète que “ei ua grana oportunitat entà nosati poder promòir eth nòste municipi d’ua forma tan peculiara pr’amor que seguraments fòrça gent mos poderà conéisher per prumèr viatge. Gràcies ad açò, mos arribaràn òbres de grana qualitat e que mos permeteràn gaudir, mès se cap, des nòsti pròpris entorns”.

Mès informacion: https://www.mundoarti.com/concursos/CEG2780/i-premio-de-pintura-naut-aran-baqueira/