Er Ajuntament de Naut Aran a inaugurat aguest maitin era exposicion deth 2au prèmi de pentura Naut Aran-Baqueira damb un cambi d’ubicacion pr’amor qu’enguan se plaçarà en renauït Musèu dera Nhèu, ena poblacion de Unha. Damb aguesta redistribucion se cèrque tanben qu’es vesins e visitants poguen descorbir aguest espaci museistic e poguen gaudir des pentures de grani artistes autant nacionaus coma internacionaus.
Eth consistòri creèc aguest concors damb eth prètzhèt de dar a conéisher eth municipi e que podessen arribar òbres artistiques d’un nivèu excellent e excepcionau. En aguest sens, de cara ad aguesta edicion, s’an mantengut es dotacions economiques entath prumèr e dusau classificat que seràn de 6.000 e 3.000 èuros respectivaments mès, coma nauetat, es menors de 18 ans auràn tanben dus prèmis que seràn de 500 èuros entath prumèr classificat e 300 èuros entath dusau classificat.
En totau, s’an presentat mès de 170 òbres, qu’era majoria provien d’Espanha, mès i a autors qu’an mostrat eth sòn interès des de Colòmbia, Veneçuela, Argentina, Alemanha, Brasil, Chile, Còsta Rica, Kazakhstan, Portugal e Andòrra. Sus açò, era tinent d’alcalde der Ajuntament de Naut Aran, Anna Geli, destaque que “aguest concors ei ua accion culturau que se consolide en temps. Damb aguest concors eth municipi se torne a posicionar de forma internacionau en airaus coma per exemple era pentura entà mostrar un producte diferent entà toti es vesins e visitaires que s’apròpen ath nòste territòri pendent aguestes setmanes”
Ath delà, sus plaçar es òbres en Musèu dera Nhèu ahig que “er Ajuntament de Naut Aran a designat aguest espaci renauït entà que sigue er epicentre de totes es exposicions, conferéncies, collòquis e d’autes accions que se volguen hèr en municipi a trauès deth consistòri”.
Era entrada ath Musèu dera Nhèu entà contemplar es òbres e visitar tot er equipament será gratuït ath long deth mes de junshèga e es òbres s’expausaràn deth 10 enquiath 30 de junshèga. Es guanhadors se coneisheràn eth dissabte 29 de junhsèga en Parador d’Arties en un acte organizat per Ajuntament de Naut Aran.