Era poblacion de Bagergue renauirà era pròplèu primauera de forma complèta ua des sues vies principaus d’accès ara localitat, eth carrèr Lagoarto, pr’amor que hège fòrça temps qu’auie de besonh ua adeqüacion a toti es nivèus.
En aguest sens, s’actuarà en un totau de 605 m2 entà repavimentar tota era zòna per un solèr fòrça mès resistent, hèt a basa de calada de granit e que ja a dat bon resultat en d’auti carrèrs adjacents. Rebrembam qu’en Naut Aran, patissen mès aguest tipe d’infrastructures pr’amor qu’ath long der an i a fòrça cambis meteorologics sustot damb era preséncia dera nhèu.
Ath delà, tanben s’harà era separacion des aigües residuaus des aigües pluvials qu’anaràn d’aguesta forma separades per dus tuèus e recorreguts diferenti. Aguesta òbra serà integrauments finançada per Ajuntament de Naut Aran per valor de 73.000 èuros damb ua subvencion de 25.000 èuros per part deth PUOSC (Plan Unic d’Òbres e Servicis de Catalonha) e era direccion dera òbra e redaccion deth projècte per part dera EMD de Bagergue.
Eth baile de Naut Aran, César Ruiz-Canela, destaque que “des der Ajuntament de Naut Aran tostemp daram supòrt a totes es pedanies quan mos ac solliciten per bèra accion que les calgue amiar a tèrme en pòble. Campam tostemp en base as sòns besonhs”.
Aguestes accions contemplen tanben era milhora d’ua part deth carrèr Pontet dera madeisha poblacion. Es òbres començaràn en abriu der an 2022 en tot acabar era Setmana Santa.