Er Ajuntament de Naut Aran a iniciat ua sèria d’accions entara milhora des carrèrs Lagoarto, Pontet e era plaça deth Musèu de Bagergue entà amiar a tèrme era separacion d’aigües pluviaus e residuaus e plaçar ua capa de calada de granit entà deishar era via enes condicions mès avientes possibles e armonizar damb era estetica dera rèsta dera poblacion entara sason d’ostieu.
Eth pressupòst totau ascendís as 110.000 èuros, des que 25.000 èuros provien deth Plan Unic d’Òbres e Servicis de Catalonha (PUOSC). Era rèsta serà integrament finançat peth consistòri municipau. Pera sua part, des dera EMD de Bagergue s’a amiat a tèrme era adjudicacion d’aguesti trabalhs.
Era extension complèta ena que se trabalharà en aguesti tres endrets concrèts serà de 604 mètres quarrats. En aguest sens, cau destacar qu’era poblacion de Bagergue non a aplicat cap sistèma entà poder realizar era separacion des dus tipes d’aigua e qu’amiar a tèrme era accion ère imperativament de besonh entà ua gestion mès eficienta e sostenibla des recorsi.
Sus açò, eth baile dera EMD, Marc Tarrau, destaque que “era separacion d’aigües ei fòrça importanta entà trabalhar era futura connexion d’aigües residuaus de Bagergue damb era depuradora de Naut Aran. Er objectiu principau qu’auem ei poder aplicar aguest modèl a tota era poblacion.”
Atau madeish, concrète que “trabalham en embelhiment deth nòste entorn. Fòrça des nòsti carrèrs an auut d’engodronar-se e reengondronar-se entà poder garantir as nòsti vesins servicis basics coma era lum o era fibra optica. Plaçar ua capa de calada de granit completaments naua darà ua grana imatge entar ostieu quan arribaràn es visitants ara nòsta poblacion. Auem hèt dejà bères accions d’aguest estil en ubicacions coma era plaça Planhèra o eth carrèr Major”.
Aguestes accions finalizaràn apuprètz a darreries de junh en tot coïncidir damb era arribada de visitaires ena zòna. Era poblacion de Bagergue ei un des emplaçaments mès espectaculars deth territòri aranés e atau a estat reconeishut en èster distingit coma un des pòbles mès polidi d’Espanha e damb era certificacion mès nauta per part deth concurs de Viles Florides.