Er Ajuntament de Naut Aran a autrejat 22 relòtges de teleassisténcia as vesins majors de 75 ans deth municipi qu’atau ac an sollicitat entà qu’es sòns familhars poguen saber en tot moment en quin estat se trape aguesta persona. Ath delà, se repartiràn 7 mès entà d’auti vesins qu’an demanat aguest servici dehòra deth tèrme establit peth consistòri.
Aguest relòtge, aurà era capacitat de vincular-se damb un telefòn deth familhar. S’eth familhar marche de casa per motius laboraus o personaus e a de deishar ara persona grana soleta ena sua viuenda en ua posicion que non pòt comunicar-se damb eth, pòt saber gràcies ath telefòn, a on ei, se s’a queigut o es sues constantes vitaus entà saber qu’eth familhar se trape en un estat de salut adequat. En aguest sens, pòt sarrar un boton entà avertir ath familhar e qu’aguesti poguen avisar as servicios sanitaris.
Eth baile der Ajuntament de Naut Aran, César Ruiz-Canela, destaque que “damb aguesti relòtges de teleassisténcia pensi que garantim ua major seguretat entàs nòstes persones granes autant coma entàs sues familhes perqué les garantim que poguen auer un mejan de comunicacion dirècte e senzilh entà que poguen comunicar-se en cas d’ua emergéncia reau”.
Er Ajuntament de Naut Aran finançarà quinsevolh tipe sigue de còst que sigue restacat ad aguest relòtge de teleassisténcia. Entre es sues despenses, se sufragarà era inversion iniciau deth dispositiu qu’ei de 100 èuros, atau coma era quòta de manteniment mensuau dera aplicacion qu’ei de 12 èuros ath mes. Eth pressupòst totau destinat ad aguesta accion ei de 20.000 èuros.