Aguest dimenge 24 de seteme entàs 10:30 era glèisa de Cap d’Aran de Tredòs acuelherà era conferéncia sus es pentures romaniques extraviades hè mès de 50 ans e que s’an trobat recentaments en ua collecion privada de Soïssa per part de dus investigadors dera Universitat de Barcelona (UB).
Aguesta trobalha istorica s’amièc gràcies ath trabalh dera catedratica Milagros García e eth professor Juan Antonio Olañeta que seguiren era pista d’aguesta pentura de Sant Gervasi dera glèisa de Cap d’Aran e de d’autes cinc òbres mès en Musèu d’Art de Basilea e sollicitèren ad aguest equipament culturau meter-se en contacte damb es propietaris actuaus, es quaus les facilitèren veir e fotografiar es pèces.
Er Ajuntament de Naut Aran, a trauès deth departament de Cultura, e era EMD de Tredòs, dempús de conéisher aguesta informacion dera descubèrta, se metec en contacte damb es investigadors entà que poguessen amiar a tèrme ua conferéncia en municipi entà explicar tot aguest procès e era importància d’aguestes pentures.
En aguest sens, era tinent d’alcalde deth consistòri, Anna Geli, explique que “auem considerat tanplan important era trobalha d’aguestes pentures e qu’es recercaires poguessen vier a Naut Aran a explicar com a estat eth transcors des aconteishements der inici damb es prumères investigacions enquia qu’aueren era possibilitat de veir es òbres de prumèra man. Ei fonamentau auer consciéncia deth valor arquitectonic qu’auem en casa nòsta”.
Era conferéncia s’amiarà a tèrme entàs 10:30 deth dimenge, abans dera missa en aunor a Sant Damian e Sant Còsme ena glèisa Cap d’Aran de Tredòs, emmarcada laguens deth programa des hèstes majors d’aguesta poblacion.