Er Ajuntament de Naut Aran damb eth baile, César Ruiz-Canela, e d’auti còssos municipaus an assistit ara hèira termau mès importanta deth mon, Termatalia. Aguest eveniment a compdat damb era participacion de 34 païsi de tot eth mon e ena qu’a participat era Associacion de Viles Termaus de Catalonha.
Dempús dera darrèra edicion celebrada en Ourense en 2019, Termatalia refortilhe eth sòn caractèr pònt termau entre Euroàsia e America damb era celebracion d’ua naua edicion aguest 2022. En aguest sens, se convertís de nau en un centre de negòcis e coneishença qu’a amassat professionaus d’aguesta especialització a nivèu globau. Pendent aguestes jornades, s’a fomentat er escambi d’experiéncies entre diuèrsi continents, des d’un punt d’enguarda empresariau, institucionau e sociau, entà obtier ua perspectiva generau deth sector, damb eth prètzhèt d’impulsar eth mercat estrategic deth Torisme Termau e de Benèster.
César Ruiz-Canela, pòrtavotz aguest maitin de Viles Termaus de Catalonha e maximom representant der Ajuntament de Naut Aran destaque que “aguesta hèira ei fòrça importanta laguens de tot eth panorama deth termalisme. Se l’auessem de comparar a nivèu toristic, parlaríem que serie un FITUR pr’amor qu’amasse fòrça païsi deth mon que son especialistes en aguesta matèria”.
Ath delà, ahig que “nosati èm un referent deth mon des espòrts d’iuèrn e credem qu’eth termalisme pòt èster ua grana oportunitat de promocion locau entà complementar tota era aufèrta qu’auem ath long der an. Eth nòste objectiu ei èster ua referéncia termau a nivèu europèu, e ei per açò que proximament sollicitaram era adesion ara Associacion Europèa de Viles Termaus”.
Termatalia 2022 s’a desvolopat en Ourense des d’aguest passat dimars damb ua sèria de congrèssi e taules redones e a concludit aguesta tarde damb era presentacion finau per part deth baile municipau. Er an que ven aguesta hèira vòle enquia Uruguai que serà eth lòc qu’acuelherà era següenta edicion de Termatalia.
Er Ajuntament de Naut Aran forme part dera Associacion de Viles Termaus de Catalonha que se constituïc en moments prealables ara aparicion dera Covid-19 e que s’a oficialitzat coma organisme eth mes de març passat.