Er Ajuntament de Naut Aran en tot cercar facilitar era vida des vesins deth municipi a iniciat ua accion entà remassar es residus e materiaus voluminosi ena sua pròpria casa damb er objectiu que non s’acumulen enes principaus bateries de contenedors que i a enes pòbles.
Eth sistèma de recuelhuda foncionarà es dimars e es dijaus e auràn de trucar ath personau dera brigada de Naut Aran entà acordar ua data e ora entà remassar aguesti materiaus. En cas que un vesin non pogue èster en aqueth moment en sòn abitatge, ac deisharàn dehòra dera sua pròpria casa entà que pogue èster prenut per aguest servici municipau.
Ath delà, des der Ajuntament de Naut Aran s’apunte er hèt qu’aguest benefici sociau afècte unicaments as vesins empadronats mès que non includís as enterpreses. Sus açò, eth baile de Naut Aran, César Ruiz-Canela, explique que “auem installat camères de videovigilància enes poblacions de Salardú e eth nuclèu de Baqueira entà que non se produsisquen abituds incívics. Ei totauments proïbit deishar rèstes de tercum o de construccion enes contenedors, o ath torn d’aguesti, e sancionaram quinsevolh actitud que sigue d’aguest tipe”.
Damb aguesta iniciatiua, eth consistòri cerque melhorar era imatge dera zòna que s’a vist en diuèrses escadences prejudicada per aguest tipe d’accions.