Eth Plen der Ajuntament de Naut Aran a aprovat aguest maitin eth renauiment dera sua imatge corporativa damb es vòts en favor de toti es grops que formen eth consistòri damb er objectiu de poder projectar-se a nivèu locau, nacionau e internacionau damb ua preséncia mès distintiva, emblematica e singulara.
Aguest nau logotip ei frut d’un long periòde de trabalh que s’a segmentat en diuèrses fases: en prumèr lòc, s’a cercat mantier es elements singulars que compausen aguest simbèu e adaptar-les a ua naua vision sense alterar era sua esséncia damb era intencion d’auer ues formes e estructures mès visibles. En aguest sens, laguens der escut se tròben representadi es elements des poblacions de Salardú, Tredòs, Bagergue, Arties e Gessa.
Laguens des naues aplicacions deth logotip se destaque era possibilitat de poder seccionar-lo per airaus coma per exemple son es d’espòrts, cultura, accion sociau, torisme, miei ambient o infrastructures entà poder hèr promocions e publicitat especifica en foncion der eveniment o accion que se pogue promòir. Eth nau distintiu poderà aplicar-se tant es espacis fòrça redusidi coma en granes lònes entà poder projectar-lo d’ua forma excellenta.
Era tinenta d’alcalde der Ajuntament de Naut Aran, Anna Geli, afirme que “auiem de besonh ua reformulacion deth logotip pr’amor que non acabaue de foncionar aguesta version mès classica. Vesins, provedidors e organizadors d’eveniments mos demanauen un cambi pr’amor que non se vedie damb claretat e damb aguesta naua imatge auem hèt un gran saut qualitatiu. I a un gran trabalh darrèr e era rèsta de grops deth plen l’an verificada e mos an felicitat”.
Aguesta naua identitat corporativa ja se pòt consultar enes hilats sociaus atau coma ena web deth pròpri consistòri.