Naut Aran e Calella de Palafrugell, destacadi referents toristics en iuèrn e en ostieu, an iniciat ua accion conjunta damb era que pretenen atrèir mès torisme a totes dues destinacions, enes moments qu’era activitat toristica ei en marcha mès eth fluxe de visitants ei d’abituda mès hloish. Era campanha a coma objectiu compartir es viatgèrs d’andues destinacions, pr’amor que per temporalitat e per perfil, combinen ara perfeccion.
Naut Aran ei eth referent des espòrts d’iuèrn en tot er Estat. Damb era estacion d’esquí de Baqueira Beret en tot foncionar a plen rendiment pendent tota era sason, aguest municipi aranés tanben destaque pera meravelhositat des sòns pòbles coma son Garòs, Arties, Gessa, Unha, Salardú, Bagergue, Tredòs e Baqueira, toti connectadi per un camin nomentat camin reiau qu’a esdevengut un des principaus atractius ena zòna. Era gastronomia locau, es sòns magnifics e suenhadi espacis naturaus e un potent romanic son bèri uns des complements ara grana aufèrta que se presente pendent era sason d’iuèrn. Segontes era tecnica d’eveniments der Ajuntament de Naut Aran, Gabriela Calero, “eth nòste municipi destaque en tot auer uns servicis excepcionaus e pensam que Calella de Palafrugell tanben les aufrís e ei ua sinérgia fòrça positiva qu’eth sòn client pogue informar-se e apropar-se en casa nòsta atau coma es que vien a Naut Aran vagen dempús aquiu entà víuer ua experiéncia e sensacions completaments diferentes”.
Calella De Palafrugell, Llafranc e Tamariu, son era perfècta representacion dera Còsta Brava mès autentica: cales sauvatges, camins de ronda, istòria e auviatge, gastronomia d’elèit, hestaus, tradicion e modernitat… Es mesi d’abriu e mai son ideaus entà visitar aguesta destinacion, damb eth clima primaverau e sense es aglomeracions der ostieu. Segontes explique Marc Piferrer, còsso de Torisme e promocion economica de Palafrugell, “Coma qu’enquia darreries de març era activitat toristica en Naut Aran non met eth fren, e eth sòn visitant ei un client potenciau entara nòsta destinacion, auem creigut avienta hèr aguesta campanha entà atrèir nau public mès que mès des zònes de Madrid, País Basc e rèsta de Catalonha entà que mos visite ena primauera, qu’ei quan mès li cau ath sector toristic de Palafrugell”.
Era collaboracion entre aguesti dus municipis nèish gràcies ara Agéncia Catalana de Torisme (ACT) e eth sòn sagèth Pòbles damb encant, ath qu’apertien ada eth 14 municipis de Catalonha. Ei laguens d’aguest marc qu’era ACT collabòre damb aguesta campanha de comunicacion, en tot aufrir supòrt en format de banners publicitaris dirigidi ath public objectiu d’aguestes dues destinacions toristiques, tan opausades e ath madeish viatge tan complementàries.