Des d’aguesta setmana, eth consultòri sanitari de Salardú s’a tornat a méter en foncionament dempús de mesi de trabalh e accions ena reforma integrau dera sua estructura intèrna.
Aguesti cambis s’an amiat a tèrme pr’amor qu’es installacions se trapauen en mau estat e non èren foncionaus entara atencion as pacients ne entath desvolopament des foncions deth personau sanitari. En aguest sens, s’a optat per ampliar er espaci deth consultòri dera infermièra, s’a adaptat eth banh entà persones damb discapacitat, s’an rebastit es parets e cambiat era tèrra, es mòbles e era illuminacion d’aguest entorn.
Ath delà, eth consistòri, tanben a optat per insonorizar tot eth locau pr’amor qu’anterioraments s’escotauen es tapatges que venguien deth pròpri ajuntament o deth trafic des veïculs que crozauen eth carrèr en aqueth moment.
En totau, s’an destinat 60.000 èuros entà executar aguesta accion des quaus, 6.000 èuros, an estat subvencionadi pera entitat bancària dera Caixa deth madeish pòble de Salardú.
Eth baile de Naut Aran, Cesar Ruiz-Canela, destaque que “auiem de besonh qu’eth consultòri de Salardú se convertisse en un espaci sanitari digne entàs nòsti vesins e damb aguest remodelament ac auem artenhut”. Atau madeish, concrète que “toti es materiaus damb es que s’a dessenhat aguest nau espaci son es que recomanen es protocòus sanitaris entà milhorar era atencion ath pacient”.
Eth consultòri de Salardú daurís toti es dies de deluns a diuendres en orari de 11:30 a 14:00 damb ua plantilha de 2 professionaus e realize es foncions d’un centre d’atencion primària.