Er Ajuntament de Naut Aran e era Associacion Amics de Montgarri an junhut fòrces entà crear eth prumèr hestau “Aqueres montanhes”. Aguesta sinergia a coma objectiu era de difóner era lengua, cultura, tradicions e d’autes qüestions vinculades damb era Val d’Aran, er aranés autant coma era lengua occitana e era vida de montanha enes Pirenèus.
En aguest sens, es activitats previstes començaràn eth diuendres 4 d’agost damb un talhèr d’enigmistica damb Xavi Gutiérrez, un des grani escrivans e poetes dera actualitat en Aran e creador deth Mot Horaviat, ena Bibliotèca de municipau de Salardú. Ath delà, eth dissabte 5 d’agost entàs 18:00 dera tarde s’harà eth prumèr campionat de petanca de Naut Aran en camp de petanca plaçat en Salardú enes naues installacions municipaus bastides peth pròpri consistòri d’aguest jòc tradicionau occitan. Pendent era jornada deth dimenge s’harà eth groish deth programa en tot iniciar-se damb un talhèr manual infantil de crotz occitana ena Sala Sociau de Salardú entàs 10:30. A compdar des 18:00 dera tarde seguís era programacion en Montgarri damb un concèrt de Bosnerau, ua projeccion des 50 ans des Amics de Montgarri e fin finau entà barrar era grana hèsta i aurà un concèrt de Lou Dalfin.
Sus era realizacion d’aguest gran eveniment culturau, era tinent d’alcalde e còsso de cultura, Anna Geli, explique que “creigui qu’er hèt d’amiar a tèrme aguest tipe de hestau ei tanplan important dera manera que l’enfocam pr’amor que son tèmes de montanha, lengua, cultura e tradicion e aquerò mos hè unics. Non ei çò de madeish portar “Lo Daufin” ath Palhars qu’ena Val d’Aran. Pensi qu’aguest ei eth lòc ideau entà hèr aguesti concèrts, non sonque tà apropar persones que s’interèssen especificament pera cultura senon tanben entà atrèir a toti aqueri vesins dera Val d’Aran que non tan interessadi en aguest airau”.
Ath delà, afirme que “ei plan important bastir sinergies entre es vesins e er ajuntament entà crear eveniments que non sonque gesquen deth consistòri senon tanben dera volentat des persones. Aqueres montanhes n’ei un exemple e non vò èster un hestau de sonque un dia, senon que volem potenciar e impulsar activitats restacades ara cultura, lengua e tradicion”.
Des der Ajuntament de Naut Aran s’extèn ua felicitacion as Amics de Montgarri per auer arribat ad aguest punt des 50 ans en tot destacar eth sòn papèr en manteniment de tot er encastre paisagistic d’aguest parçan.