Dempús de diuèrsi mesi que non s’a pogut prosseguir damb es accions entara creacion d’un Skate Park ena zòna d’Arties, s’an tornat a méter en marcha un aute viatge es òbres entà finalizar aguest projècte damb era major celeritat possibla. Rebrembam que s’aueren d’arturar aguestes accions pr’amor des dolentes condicions climatològiques perqué, en iuèrn, era zòna d’Arties acostume a èster nheuada un gran nombre de dies e non se garantie ua continuitat en procès.
Er Ajuntament de Naut Aran aprovèc eth passat mes de març de 2021 era creacion d’un complèxe de 506m2 fòrça complèt e adaptat entà toti es nivèus ena qu’ei contemplada era installacion d’un ‘bowl’, comunament nomentada piscina, e d’auti elements coma un ‘croissant’, ‘quarter slappy’, ‘wobblecano’, ‘europad’, entre d’auti. Se tractarà deth prumèr Skate Park de granes caracteristiques qu’aurà era Val d’Aran pr’amor que, actuauments, sonque i a ua petita rampa ena poblacion de Vielha.
En totau, s’an destinat 165.000 èuros en bastiment d’aguest espaci que serà fin finau de hormigon. Era idèa iniciau der Ajuntament de Naut Aran ère crear-lo damb ua basa de gondron, mès des deth collectiu skate dera Val d’Aran s’aconselhèc que siguesse damb un materiau coma eth hormigon pr’amor que serie mens abrasiu as queigudes e derrapades.
Eth baile de Naut Aran, César Ruiz-Canela destaque que “voi rebrembar qu’aguest projècte ei frut dera participacion ciutadana. Siguec ua idèa que se mos promoiguec a trauès des hilats sociaus, concrètaments per Instagram, e tot a anat rodat des d’alavetz damb era sua collaboracion. Credem qu’eth nau Skate Park serà un gran atractiu esportiu que mos plaçarà en un lòc preferent ena practica d’espòrts alternatius”.
Er Ajuntament de Naut Aran considère que damb era zòna poliesportiva d’Arties amassa damb eth Pump Track e eth Skate Park e er espaci de biciclèta de montanha de Enduromies, se crearà un espaci ludic-esportiu que se enaltiran es abituds saludables entres es joeni.