Aguesta darrèra setmana s’an inaugurat es visites guidades ath campanau dera glèisa Sant Andrèu de Salardú. A darreries d’est an passat se dauric er accès ath public gràcies a ua accion conjunta der Ajuntament de Naut Aran, Conselh Generau d’Aran, Deputacion de Lhèida, Generalitat de Catalonha e era Parròquia de Naut Aran e sèt mesi mès tard s’a ampliat era aufèrta en tot inclodir visites guidades ad aguest espaci.
Es oraris entà poder gaudir d’aguest temple religiós serà de deluns a dissabte entàs 11:00 e entàs 12:30 de meddia e es visites s’amiaràn a tèrme per part dera equipa que conforme eth Hilat de Musèus dera Val d’Aran. Er aute campanua qu’ei visitable a dia d’aué ei eth de Sant Fèlix de Bagergue, a on es oraris de visita son mès redusits pr’amor que serà sonque es diuendres entàs 11:00, 12:00 o 13:00 ores.
Sus era inauguracion deth campanari visitable de Sant Andrèu de Salardú de forma guidada, era còsso de cultura e prumèra tinent d’alcalde der Ajuntament de Naut Aran, Anna Geli, afirme que “des deth consistòri èm erosi que fin finau eth nòste auviatge pogue esdesvier un atractiu mès tath nòste municipi, non sonque entàs que mos visiten senon tanben tà toti es vesins e vesies de Naut Aran”. Ath delà, concrète que “aguesta jòia arquitectonica mos permet gaudir d’ua des tors mès elegantes deth romanic e d’ues vistes privilegiades de Salardú e es sòns entorns des d’ua nautada deth torn des 23 mètres. Des der ajuntament seguim en tot promòir eth torisme culturau en toti es sòns encastres, coma tanben per exemple, er impuls dera prumèra hèsta culturau ‘Aqueres Montanhes’ ramificat entre Salardú e Montgarri.”.
Eth campanau dera glèisa Santa Andrèu serà visitable entath public generau, en grops redusidi e guidadi en ua activitat aufrida per Musèus dera Val d’Aran. Aguesta infrastructura a un gran interès arquitectonic e istoric, non sonque pera òbra de fabrica, mès tanben, pes estructures interiores de husta, ath delà d’auti elements de gran interès coma eth sòn mecanisme deth relòtge deth sègle XVIII o es madeishes campanes.
D’autes glèises que tanben aufrissen visites guidades mès, sense eth sòn campanau son Santa Maria de Cap d’Aran, en Tredòs, de deluns a dissabte entàs 11:00 e entàs 12:30, e es glèises Santa Maria d’Arties e Santa Eulària de Unha entàs 17:00, 18:00 e 19:00. Aguest servici ei abilitat enquiath pròplèu 3 de seteme.