Es pròplèus 8, 9 e 10 d’abriu s’harà era dusau edicion dera Hèira d’Abriu de Naut Aran. Aguest eveniment s’aurie d’auer hèt es ans 2020 e 2021 mès era crisi sanitària deth coronavirus ac empedic entà evitar quinsevolh tipe de risc de contagi, sustot en an 2021. En 2020, cau rebrembar que se decretèc eth confinament de tota era poblacion enes sòns abitatges, a excepcion de casi excepcionaus.
Enguan, donques, tornarà era dusau edicion d’aguesta hèsta damb era que se pretén apropar es tradicions, cultura, gastronomia e ambient dera Hèira d’Abriu tipica dera ciutat de Sevilha. Es activitats se basaràn principauments en exibicions, actuacions, espectacles e workshops. En aguest darrèr cas, es talhèrs serviràn entà qu’es visitants ar eveniment poguen apréner e melhorar ena tecnica dera rumba e eth garrotín, balhs que provien dera region d’Andalusia.
Er Ajuntament de Naut Aran a finançat era arribada de toti es artistes e, per aguest motiu, era entrada en tot eth recinte serà gratuïta, atau coma era assisténcia a totes es accions. En aguest sens, eth baile de Naut Aran, César Ruiz-Canela, destaque que “èm fòrça contenti de recuperar ua hèsta qu’inicièrem er an 2019 e que malerosament non li auem pogut dar continuitat pera crisi sanitària. Portar d’autes cultures e compartir-les damb es nòsti vesins entà dinamizar eth municipi ei ua des nòstes prioritats, e ac demòstre tan aguesta hèsta coma era que hèm en ostieu damb eth Salardú Country Ròck Festival”.
Era sala polivalenta de Salardú serà eth lòc escuelhut entà amiar a tèrme tot er eveniment pr’amor qu’ei un espaci de granes dimensions e que pòt acuélher un gran nombre de visitants. Entad aguesta escadença, se tematizará tota era sala ath mès pur estil andalús entà qu’es persones que s’apròpen a gaudir des actes, poguen auer eth sentiment de víuer ua Hèira d’Abriu sevillana.
Segontes es actuaus nòrmes e protocòus sanitaris, es participaires auràn d’auer era masquèta metuda laguens deth locau. Aguest eveniment ei organizat per Ajuntament de Naut Aran, era enterpresa ‘Videoperformance’ e er Institut de Dança e Arts Sceniques Alexandra Jiménez de Lhèida.