Er Ajuntament de Naut Aran seguís un an mès damb eth projècte dera Marcha Nordica dempús dera bona acceptacion qu’a auut pendent aguesta darrèra campanha. Rebrembam qu’era idèa sorgic gràcies ara iniciatiua de diuèrsi vesins e professionaus sanitaris dera zòna, que reclamauen poder realizar aguest tipe d’activitat entà poder revitalizar fisicaments a persones de totes es edats e evitar problèmes cardiovasculars o d’autes patologies coma era artròsi.
Pendent era sason 2022 de Marcha Nordica en Naut Aran se hèren un totau de 75 gessudes damb origina en Salardú e Arties des quaus se’n beneficiades 47 persones qu’anauen de forma regulara ad aguestes e que, de mejana, i assistien ath torn de 10 persones per session. Eth mes que mès usatgèrs gaudiren d’aguesta iniciatiua deth consistòri siguec en abriu, damb ua mejana de 15 usatgèrs.
En aguesta sason 2023, es numèros s’an mantengut e era prevision ei qu’enquia darreries d’an se poguen amiar a tèrme enquia 80 gessudes, en tot aumentar atau era periodicitat. Es gessudes s’haràn es deluns des deth parc des ossi en Arties e es diuendres des dera plaça Querimònia de Salardú. Es distàncies que se recorren son d’entre 5,5 km e 7,5 km.
Eth baile de Naut Aran, César Ruiz-Canela, destaque que “èm fòrça contenti qu’es nòsti vesins poguen gaudir dera Marcha Nordica tot er an e volem contunhar d’impulsar-la entà aufrir alternatiues saludables e esportiues tà toti es publics”.
De cara a aufrir mès visibilitat ath grop e premiar as participaires, s’an dessenhat ues camisetes especifiques qu’a subvencionat er Ajuntament de Naut Aran. Ena sason d’iuèrn s’aufrirà ua aute pèça deth madeish estil, totun mès abrigada entà poder contunhar en tot visibilizar era accion pendent es mesi de mès heired.