Bagergue
Descripcion
Eth pòble de Bagergue (102 abitants) ei eth mès naut dera Val, plaçat a 1.419 mètres de nautada, en sector mès meridionau dera Val dera Unhòla.
Pes sòns carrèrs empeiradi e endreçadi, se pòt anar a visitar eth musèu particular “Eth Corrau” , ua mòstra de 2.500 objèctes que plasmen ua cultura, ues tradicions , un mon laborau e mestierau ancestraus.
En Bagergue destacam era glèisa parroquiau de Sant Félix, iniciauments romanica, deth sègle XIII, qu’auec transformacions, se substituïc er absida semicircular originau per un presbiteri quadrat e s’ahigec dues capèles, ua sacristia e un campanau. Ath laguens dera nau i trapam un Crist fòrça primari deth periòde gotic de transicion, qu’exprèsse fòrça dolor ena cara, damb eth cap coronat d’espies e eth còs flagelat. Tanben trapam ua estela funerària preromanica de fòrça importància.
En tot Seguir era ribèra dera Unhòla cap ath nòrd, a pòc mès d’un Km, i trapam, ath marge quèrra der arriu, era petita ermita de Sta. Margarida, a on s’hestège annauments ua romeria eth dia 20 de junhsèga .
Ara entèsta dera Unhòla i trapam er estanh de Liat, er estanh de Montoliu, er estanh de Maubèrme, que vau era pena de visitar, en tot hèr ua agradiua caminada en un dia assolelhat.
En tot seguir era zòna fronterèra damb er Estat Francés, trapam un des crèstes mès destacades, eth tuc de Maubèrme de 2.880 m.
Hestège era hèsta major per Sant Felix a principis d’agost, e era romeria a Sta. Margarida eth 20 de junhsèga. Compde damb servici de restaurants e hotèl.