Er Ajuntament de Naut Aran trabalhe des de hè uns dies ena reforma d’un tram dera travesia de Salardú que connècte eth pònt der arriu Unhòla damb era naua pòrta d’entrada qu’ei acabant-se de bastir. En aguest sens, ua des accions principaus a estat era separacion entre es aigües pluviaus e es residuaus. Enquiath moment, aguestes dues aigües convergien e acabauen ena depuradora de Garòs en tot hèr a trabalhar ad aguest equipament fòrça mès deth que deuie.
Ei per açò, que s’a decidit des deth consistòri efectuar ua sèrie de mesures entà qu’es aigües pluviaus vagen dirèctes ar arriu Unhòla e es residuaus ara depuradora entath sòn posterior tractament. Atau madeish, damb aguesta òbra, se profitarà entà crear un totau de 12 places de parcatge que poderàn èster utilizades entà corbir un des besonhs essenciaus des vesins e visitants dera poblacion, coma ei eth de trapar un lòc en qué aparcar es sòns veïculs sustot ena sason d’iuèrn.
Ath delà, s’a cambiat eth paviment deth trepadèr pr’amor que se trapaue en mau estat e s’a substituït per un aute hèt de panòt d’hormigon adaptat entath transit de persones.
Segontes eth baile de Naut Aran, Cesar Ruiz-Canela, “aguesta accion ère de besonh pr’amor que non èrem eficients en sistèma de tractament d’aigües e ath delà, entre auti ahèrs, guanharam 12 places de parcatge mès que permeteràn as vesins mès facilitats entà deishar es sòns veïculs enes sasons de nauta aucupacion en territòri.”
Ei previst qu’aguestes accions ena travesia de Salardú finalizen de cara ath mes de noveme.