Er Ajuntament de Naut Aran a invertit 275.000 èuros en manteniment des pistes forestaus que connècten damb Aiguamòg e era zòna de Colomèrs. Toti dus punts, son consideradi coma atractius toristics de naut nivèu entara Val d’Aran pera afluéncia de visitants que s’apròpen ath long der an, sustot en ostieu.

En aguest sens, es melhores s’an executat en dues fases: era prumèra, que finalizèc eth passat mes d’octobre, consistic ena creacion de 1,5 quilomètres de cuneta americana, ei a díder, de hormigon, damb ua amplitut totau d’un mètre. D’aguesta forma se cerque garantir era seguretat non sonque entàs veïculs motoritzats senon que tanben entath transit de persones pr’amor qu’ei abondiu sustot en aguesti pròplèus tres mesi.

Ath delà, eth consistòri, a engondronat aguesta setmana un tram de 2,7 quilomètres pr’amor qu’auie diuèrses henerècles e horats, e era pista non se trapaue enes milhors condicions entara practica de bèth espòrt coma era biciclèta o eth pròpri pas de veïculs. Aguestes accions finalizaràn eth deluns e pretenen milhorar era experiéncia des vesins e visitants en municipi de Naut Aran.

Segontes eth baile der ajuntament, Cesar Ruiz-Canela, “cada ostieu passen mès de 50.000 persones per aguesta pista forestau e auem de besonh auer ua infraestructura de qualitat entà qu’era gent que mos visite, pogue accedir a entorns coma Aiguamòg, o es lacs de Colomèrs sense cap tipe de complicacion”.

Pendent aguesta setmana, eth transit cap ara zòna d’Aiguamòg a estat talhat e se redaurirà previsiblaments aguest deluns quan finalizen es òbres de condicionament dera via.