Er Ajuntament de Naut Aran a reengondronat es carrèrs Bodigues, Claveròla e Solei pr’amor que se trapauen en mau estat e degradadi peth pas des ans. Es henerècles en cèrti punts èren evidentes e i auie lòcs a on eth nivèu deth carrèr non ère eth corrècte.
Ei per açò, que s’an destinat 65.000 èuros ara milhora d’aguesti espacis e ar ajustament des sòns arribents. Damb aguestes mesures, se preten incrementar era seguretat deth transit de persones e de veïculs ena zòna.
Es trabalhs s’an alongat un totau de cinc dies e, damb açò, se barre eth renauiment de toti es carrèrs dera zòna nauta de Salardú, executades ath long d’aguesti ans.
Ath delà, hè ues setmanes tanben s’acabèren d’autes accions en carrèr Bodigues coma eth renauiment der hilat d’aigües residuaus pr’amor qu’aguesta se taponaue e non auie ua foncionalitat corrècta.
Eth següent pas deth consistòri, ei eth de licitar es òbres de repavimentacion dera pòrta de Salardú enquiath pònt d’Unhòla, e, mès entà deuant, ues autes actuacions que s’harien deth carrèr Major enquiath carrèr Generau Prim.