Dempús des accions qu’amièc a tèrme er Ajuntament de Naut Aran en carrèr Bodigues pendent eth mes de junhsèga, coma eth renauiment der hilat d’aigües residuaus e era repavimentacion d’aguesta via, s’a contunhat trabalhant entà milhorar aguest punt concrèt dera poblacion de Salardú.

En aguest sens, des deth consistòri s’an destinat 15.000 èuros ara creacion d’un trepadèr damb bòrd ath long de 100 mètres que permeterà aumentar era seguretat deth transit de persones ena zòna e delimitar d’ua forma mès clara eth pas des veïculs.

Atau madeish, s’an reubicat es contenidors de lordères deth carrèr Bodigues e s’a bastit ua caseta de husta de granes dimensions entà caperar era vision d’aguesti contenidors e qu’es lordères que se genèren non causen un impacte visuau as vesins que passègen pes entorns. Eth barrament de husta, serà descorbit pera part de naut entà qu’eth camion pogue remassar es residus sense cap tipe de problèma, e, ath delà, compde damb ua pòrta d’entrada entà qu’es pedons poguen depausar es sues lordères enes contenidors especifics.

Eth còst totau d’aguest nau element ei de 10.000 èuros e aguesta accion s’a finançat damb hons deth pròpri consistòri.

Respècte aguest punt, eth baile de Naut Aran, Cesar Ruiz-Canela, explique que “ei fòrça important mantier era bona imatge des pòbles e per açò volem evitar veir contenidors pleï o lordères peth tèrra sustot ena sason de nauta afluéncia de visitants. Auem aufrit ua alternatiua que mos permeterà veir eth carrèr d’ua forma mès neta e ordenada”.