Eth Plen der Ajuntament de Naut Aran a aprovat iniciaument era modificacion dera licitacion que se hèc en mes de deseme entà gestionar eth parcatge de Baqueira 1.500, coproprietat actuau deth Conselh Generau d’Aran e deth consistòri. Eth cambi residís especificament ena inclusion d’un canòn qu’anarie destinat autant ath Conselh coma ar ajuntament pera explotacion pendent un periòde de 25 ans.
Per aguest motiu, s’a variat eth plec de clausules administratives entà passar eth prètz per ora de 0,3€ per ora a 1€+IVA per ora, en tot èster un maximom de 12 € eth totau ath que s’arribarie diadièraments. Aguesta aportacion serie revisable en base ar Indèx de Prètzi de Consum (IPC). Entà favorir e priorizar aguesta execucion laguens dera licitacion i a diuèrses bonificacions contemplades entàs enterpreses que se presenten e executen eth projècte çò de mès lèu possible.
Cau rebrembar qu’en aguest parcatge de 600 places i aurie un 10% de parcatge destinat entàs veïculs de mès de 5 mètres, carregadors electrics entà veïculs qu’ac auessen de besonh, lavabos e ua melhor illuminacion. Tot açò damb un pressupòst aproximat de 2 milions d’euros en quau tanben s’emmarcarie ua milhora deth paviment.
Eth baile de Naut Aran, César Ruiz-Canela, destaque que “era intencion ei que, a darreries deth mes de seteme, era licitacion dejà sigue adjudicada a quauqua enterpresa e se poguen iniciar es tramits entà iniciar es accions tara regulacion d’aguest parcatge de Baqueira 1.500. Credem qu’auram un espaci en molt bones condicions e que favorirà ath nòste territòri”.
En cas qu’era licitacion demore desèrta, serie er Ajuntament de Naut Aran qui assumirie era gestion. Eth consistòri s’encuedarie dera survelhança d’aguest espaci mejançant es vigilants e es ingrèssi serien repartidi entre eth Conselh e eth consistòri.