Es poblacions de Naut Aran an artenhut grani resultats pendent eth liurament de distincions en concors de Viles Florides que s’a amiat a tèrme ena ciutat de Tarragona en Auditòri deth Camp de Mart d’aguesta localitat. Ath delà, Naut Aran en conjunt tanben a arrecebut de manèra especiau un prèmi unic pera recèrca de solucions sostenibles entara jardineria en entorns damb climatologia advèrsa.
Aguest prèmi a destacat eth gran trabalh efectuat per Ajuntament de Naut Aran e de totes es sues Entitats Municipaus Descentralizadessus eth bon hèr que realizen non sonque en epòques coma era primauera, ostieu o tardor, mès tanben en iuèrn quan era nhèu s’apròpe.
Sus es distincions, era poblacion mès destacada, a tornat a èster ua edicion mès Bagergue en tot arténher un totau de 4 flors, ua des maximes representacions que se pòden arribar en obtier laguens d’aguest concors, gràcies ath suenh que s’a realizat ath long de toti aguesti ans basat ena grana quantitat e qualitat de flors e arbes qu’a repartidi per tot eth pòble.
Atau madeish, es poblacions de Tredòs, Salardú, Arties, Garòs e Unha an artenhut un totau de 3 flors. Toti aguesti lòcs s’an destacat per çò qu’ei dera rèsta gràcies a cadun des sòns atractius personaus. Respècte açò, en Tredòs cau destacar era creacion deth “Camin dera Bruisha”, un espaci entà toti es publics en un bòsc encantat qu’a meravelhat ath jurat. D’auta banda, en Salardú, siguec er ampli rang de flors e es tipes d’arbes visti en nuclèu de Baqueira. Sus Arties e Garòs, era sua distribucion florau e es sòns grani espacis verdi an estat determinants entà obtier aguestes tres flors e pensar a guanhar ua quatau en futur.En Unha, era sua magnifica entrada florau encantèc as expèrts.
Fin finau, era poblacion de Gessa a estat premiada damb dues flors que li permeteràn contunhar creishent e en tot pensar en futures melhores enes sòns espacis verdi e per çò qu’ei dera sua ornamentacion entà poder optar a melhores distincions pròplèuaments.
Eth baile de Naut Aran, César Ruiz-Canela, destaque que “èm fòrça contenti que toti es pòbles de Naut Aran siguen laguens deth cercle de Viles Florides de Catalonha, hèt que mos ajude a promòir eth municipi d’ua forma diferenta e atrèir d’auti tipe de visitaires ena nòsta zòna.”
Ath delà, ahig que “credem que i a diuèrsi pòbles qu’an un gran potenciau coma Tredòs o Bagergue que seguraments en un futur pròplèu mos aufriràn granes alegries en aguest concors e que mos permeteràn potenciar eth nòste torisme per Catalonha tota.
Pera sua part, eth baile pedani de Bagergue, Marc Tarrau, qu’ei eth qu’a obtengut un melhor resultat en Viles Florides de Catalonha, afirme que “èm fòrça satisfèti de tornar a arténher 4 flors ua edicion mès. Sabem qu’era cincau ei fòrça complicada, mès mos ajude a reptar-mos entà melhorar era imatge deth nòste pòble encara mès”.
Fin finau, tanben s’a premiat as territòris deth Pirenèu dera província de Lhèida pera sua grana difusion dera marca de Viles Florides de Catalonha, que tanben i auie entre d’auti municipis a part de Naut Aran coma Canejan (1 flor), Vilac (2 flors), Vilaller o Rialp.
En aguesta naua edicion de Viles Florides de Catalonha an participat un totau de 156 municipis de Catalonha e 4 d’Andòrra.