Er Ajuntament de Naut Aran a realizat eth pagament referent as ajudes Covid-19 d’iuèrn as empresaris e autonòms que tributen e an era sua activitat economica en municipi. En aguest sens, eth totau traspassat as professionaus de diuèrsi sectors asciendís a 175.560 €.
Sus açò, 131 enterpreses e establiments an arrecebut 1200€ en tot auer presentat tota era documentacion requerida. Açò supause qu’era chifra definitiva aportada entad aguesti locaus a estat de 157.200€. Ath delà, en çò que tanh as ajudes entàs autonòms, s’an aprovat 51 qu’an estat bonificades damb 360€ cadua. D’aguesta manèra, ad aguesti professionaus se les a hèt eth pagament d’un totau de 18.360€. Aguestes dues quantitats somades da coma resultat es 175.560€ anterioraments mencionadi.
Ath sòn torn, 14 persones an presentat ua sollicitud en consistòri entà poder obtier aguesta ajuda, mès se les a denegat pr’amor que non complien damb quauqun des requisits que demanaue er Ajuntament de Naut Aran. Cau destacar qu’encara manque realizar eth pagament a un establiment e a dus professionaus autonòms per çò qu’era quantitat definitiva aumentarà enquias 177.480€.
Eth baile de Naut Aran, César Ruiz-Canela, destaque que “en aguest periòde de Covid-19 fòrça enterpreses e autonòms an vist amendrits drasticament es sòns ingrèssi e vedíem eth besonh d’aufrir-les ua ajuda dirècta entà palliar un shinhau aguesta situacion. Credem qu’aguesta aportacion economica ajudarà a subsanar en part quauques d’aguestes pèrtes”.
Er Ajuntament de Naut Aran rebrembe que, a part d’aguestes ajudes Covid a enterpreses e autonòms, tanben destinarà un totau de 20.000€ entàs familhes en risc de vulnerabilitat deth municipi entà ajudar a pagar despenes coma eth loguèr o aliments de prumèr besonh.